Í vikunni kvað dómstóll í Glostrup í Danmörku upp tímamótadóm. Málið snerist um of hraðan akstur 36 ára karlmanns. Hann var kærður fyrir að aka á 108 km/klst innanbæjar þar sem leyfður hámarkshraði er 50 km /klst. Samkvæmt nýlegri breytingu á umferðarlögunum er lögreglunni heimilt að leggja hald á bíla sem eru notaðir við svokallaðan „brjálæðisakstur“ og krefjast þess að þeir verði gerðir upptækir til ríkisins.

Það var einmitt gert í þessu máli. En ökumaðurinn átti ekki bílinn sem hann ók en það var Mazda CX-3 sem 34 ára unnusta hans hafði keypt tæpum tíu mánuðum áður og tekið lán upp á sem svarar til um fjögurra milljóna íslenskra króna til að greiða fyrir bílinn.

Málið fór fyrir dóm í Glostrup og komst dómurinn að þeirri niðurstöðu að bíllinn skuli gerður upptækur til ríkisins þar sem hann var notaður við það sem er skilgreint sem „brjálæðisakstur“ í nýju ákvæði umferðarlaganna.

Ökumaðurinn var að auki dæmdur í 20 daga óskilorðsbundið fangelsi. Hann tók sér umhugsunartíma til að ákveða hvort hann áfrýi niðurstöðunni til Landsréttar.

Verjandi parsins sagði fyrir réttarhöldin að hann telji það brot á stjórnarskrárvörðum eignarétti að gera bílinn upptækan til ríkisins. Saksóknari var annarrar skoðunar og sagðist telja niðurstöðu dómsins í samræmi við vilja þingsins með lagasetningunni.

Bíllinn verður seldur á uppboði nema málinu verði áfrýjað til Landsréttar og jafnvel Hæstaréttar í framhaldi af því og þar verði komist að annarri niðurstöðu.

Nýja ákvæði umferðarlaganna tók gildi 31. mars. Í byrjun júní hafði lögreglan lagt hald á rúmlega 170 ökutæki á grundvelli þess og mun fara fram á að þau verði gerð upptæk til ríkisins. Af þessum 170 ökutækjum eru 70 í eigu annarra en ökumannanna.