Þegar dóttir Ariani Roque Marinheiro veiktist og fékk háan hita hafði hún miklar áhyggjur af hvort hún væri með kórónuveiruna. Læknir fullvissaði hana um að börn fengju næstum aldrei alvarleg einkenni COVID-19 og að þetta myndi lagast. Tæpum tveimur vikum síðar lést dóttirin á gjörgæsludeild í Maringá í suðurhluta Brasilíu. „Þetta gerðist svo hratt og svo var hún dáin,“ hefur The New York Times eftir Marinheiro.
Þetta mál er ekki einstakt því þrátt fyrir að börn veikist yfirleitt ekki alvarlega af COVID-19 þá hafa mörg hundruð börn, yngri en fimm ára, látist af völdum sjúkdómsins. Opinberar tölur segja að þau séu 832 en þar sem mikið skortir á að sýni séu tekin úr öllum þá er talan líklega mun hærri.
Það er mjög mismunandi hvernig sýnatöku er háttað í ríkjum heims, það er að segja hversu mörg sýni eru tekin og hvernig. En ef Brasilía er borin saman við Bandaríkin, sem eru mun fjölmennari og þar hafa fleiri látist af völdum COVID-19, kemur í ljós að í Bandaríkjunum hafa 134 börn, yngri en fjögurra ára, látist af völdum COVID-19.
New York Times hefur eftir Fatima Marinho, hjá Sao Paulo háskólanum, að fjöldi þeirra barna, yngri en fimm ára, sem hafa látist af völdum COVID-19 sé yfir 2.200 síðan faraldurinn skall á. Þar af eru rúmlega 1.600 kornabörn. „Við sjáum að þetta hefur mikil áhrif á börn. Þessi tala er mjög há. Við sjáum þetta ekki annars staðar í heiminum,“ er haft eftir henni.
Því hefur verið velt upp hvort hugsanlega sé nýtt afbrigði af veirunni á kreiki í Brasilíu og að það leggist þyngra á börn. Ekki hefur verið sýnt fram á það með rannsóknum fram að þessu.
