Uppgötvun á borð við þessa er meðal þeirra sjaldgæfustu sem tengjast risaeðlum. Þetta er haft eftir Matt Lamanna, steingervingafræðingi, í fréttatilkynningu frá Carnegie Museum of Natural History í Pennsylvania í Bandaríkjunum.

Málið snýst um fund á 70 milljón ára gömlum steingervingi af hreiðri risaeðlu en steingervingurinn fannst í Nanziong í Ganzhou í suðurhluta Kína. ScienceAlert skýrir frá þessu.

Svæðið er þekkt fyrir að þar eru margir vel varðveittir steingervingar af eggjum risaeðla en þessi uppgötvun er mjög sérstök. Steingervingurinn samanstendur af átta eggjum hið minnsta og meðalstórri risaeðlu, af tegundinni oviraptor, sem liggur þétt upp við eggin. Í steingervingnum sést beinagrind risaeðlunnar sem sýnir að hún hefur verndað eggin sín allt til hinstu stundar.

Steingervingar með hreiðrum oviraptor risaeðla hafa áður fundist en þessi sker sig úr því í sjö eggjum sjást fóstrin. Uppgötvunin staðfestir að risaeðlur lágu á eggjum sínum og vernduðu þau en ekki hafði tekist að sanna þetta áður.

Líklegt er talið ungarnir hafi verið við það að klekjast út því fóstrin eru með fullgerða beinagrind.