Tvisvar sinnum hefur hin bresk/ísraelska Melanie Wolfson verið beðin um að flytja sig í annað sæti í flugvélum easyJet. Ástæðan er að hún er kona og ekkert annað. Nú hefur flugfélagið fallist á að greiða henni bætur vegna þessa og það hefur lofað að breyta starfsaðferðum sínum í þessum efnum.

Wolfson býr í Tel Aviv í Ísrael en fer reglulega til Lundúna þar sem hún ólst upp. Hún hefur oft nýtt sér þjónustu easyJet sem er stærsta lággjaldaflugfélagið í Bretlandi. En hún taldi að sér hefði verið mismunað vegna kynferðis síns um borð í vélum félagsins og krafðist því bóta upp á sem svarar til um þriggja milljóna íslenskra króna.

The Guardian segir að easyJet hafi nú fallist á að greiða henni bætur og hafi beðið Wolfson afsökunar.

Fyrra atvikið átti sér stað 2019 en þá sat Wolfson við hlið strangtrúaðs gyðings og sonar hans. Áhöfnin bað hana því um að skipta um sæti við karlmann en strangtrúaðir gyðingar telja konur ekki jafna körlum og forðast samskipti við konur sem eru ekki í fjölskyldu þeirra. Wolfson sagðist hafa verið „móðguð og reið“ vegna þessa en féllst samt á þetta til að fluginu myndi ekki seinka.

Í janúar á síðasta ári kom svipuðu staða upp þegar hún fékk sæti við hlið tveggja strangtrúaðra gyðinga og var beðin um skipta um sæti við karlmann. Því neitaði hún. Hinir strangtrúuðu gyðingar leystu þetta til að forðast nærveru við hana og fengu tvær konur til að skipta um sæti við sig. Áhöfnin aðhafðist ekkert í málinu.