Þetta eru niðurstöður nýrrar könnunar sem Foreningen Norden gerði. TT hefur eftir Josefin Carlring, aðalritara samtakanna, að niðurstöðurnar séu skýr skilaboð um að stjórnmálamenn eigi að vinna enn frekar að eflingu norræns samstarfs. „Við göngum út frá því að samstarfið hafi gengið vel og að við viljum það sama. En við erum komin í stöðu þar sem við tökum hvert öðru sem gefnum hlut,“ sagði hún einnig.
Foreningen Norden eru almenningssamtök sem vinna að auknu samstarfi á milli Norðurlandanna. Það er erfitt þessi misserin vegna heimsfaraldursins, landamæri eru lokuð og fáir sækja vinnu á milli landanna. Að auki taka ríkisstjórnir landanna misjafnlega á heimsfaraldrinum. Svíar hafa sérstaklega fengið að heyra það vegna þess sem virðist vera tilraun yfirvalda til að ná hjarðónæmi.
Niðurstöður könnunarinnar sýna að 18% Svía sögðust hafa orðið fyrir áreitni eða slæmri framkomu eða meðferð af hálfu fólks frá hinum Norðurlöndunum. Hjá þeim Svíum sem eru með bein tengsl við önnur Norðurlönd, til dæmis vegna vinnu eða fjölskyldu, var hlutfallið 29%.
