Á sunnudaginn heppnaðist geimskotið og eldflaugin flutti nokkra litla gervihnetti út í geiminn þar sem þeir fóru á braut um jörðina. Um svokallaða CubeSats er að ræða en þeir eru hluti af menntunarverkefni bandarísku geimferðastofnunarinnar NASA sem bandarískir háskólar taka þátt í.
Samkvæmt frétt The Guardian þá var eldflauginni sleppt neðan úr væng Boeing 747 undan strönd suðurhluta Kaliforníu. Skömmu síðar kviknaði á hreyflum hennar og hún þaut út í geiminn.
Virgin Orbit er meðal margra fyrirtækja sem eru að reyna að hasla sér völl á markaðnum fyrir flutning á litlum gervihnöttum út í geim. Keppinautarnir hjá Rocket Lab hafa sent 96 litla gervihnetti út í geim í 17 geimskotum. Virgin Orbit leggur áherslu á sveigjanleika með því að geta notað flugvelli um allan heim til geimskota sinna þar sem eldflaugarnar eru fluttar hátt upp í gufuhvolfið með Boeing 747 áður en þeim er skotið af stað.
