Á föstudaginn fundust lík fimm systkina á heimili þeirra í Sollingen í Þýskalandi. Móðir þeirra er grunuð um að hafa myrt þau. Hún reyndi síðan að taka eigið líf en það mistókst. 11 ára barn lifði harmleikinn af. Samkvæmt fréttum þýskra fjölmiðla er það drengur og er hann sagður hafa sent besta vini sínum skilaboð eftir að hann fékk að vita hvað hafði gerst.

Börnin, sem létust, voru á aldrinum eins til átta ára. Þrjár stúlkur og tveir drengir. Lögreglan telur að móðir þeirra hafi gefið þeim eitraðar töflur og hafi síðan kyrkt þau.

Þegar börnin voru látin er hún sögð hafa farið með 11 ára syni sínum í lest til Düsseldorf. Þaðan fór drengurinn áfram með lest til móðurömmu sinnar í Mönchengladbach. Móðir hans reyndi síðan að fyrirfara sér með því að stökkva fyrir lest en það mistókst.

Lögreglan telur að drengurinn hafi ekki orðið vitni að morðunum eða að sjálfsvígstilraun móður sinnar. Honum var síðar skýrt frá hvað hafði gerst. RTL segir að eftir það hafi hann sent besta vini sínum skilaboð um þetta:

„Ég vil bara segja að við hittumst ekki aftur því öll systkin mín eru dáin,“

skrifaði hann.

Það var móðuramman sem gerði lögreglunni viðvart og voru lögreglumenn strax sendir á vettvang. Samkvæmt fréttum þýskra fjölmiðla var aðkoman mikið áfall fyrir lögreglumenn og sjúkraflutningamenn og komu margir þeirra grátandi út úr íbúðinni. Nágranni sagði í samtali við Focus að þegar lögreglumenn og sjúkraflutningamenn hafi komið grátandi út hafi verið ljóst að eitthvað hræðilegt hafði gerst.