Þegar sólin okkar endar líf sitt eftir um fimm milljarða ára verður hún að „dauðum“ kjarna sem nefnist hvítur dvergur. En hvaða þýðingu hefur það fyrir jörðina okkar?

Vísindamenn uppgötvuðu nýlega, í fyrsta sinn, plánetu á braut um hvítan dverg að því er segir í fréttatilkynningu frá Cornell háskólanum í Bandaríkjunum. Plánetan er gaspláneta á stærð við Júpíter og hefur hún fengið nafnið WD 1856 b.

Í fréttatilkynningu frá bandarísku geimferðastofnuninni NASA er haft eftir Andrew Vandenburg, lektor í stjörnufræði við University of Wisconsin-Madison, að þegar hvítir dvergar verða til eyðileggist nærliggjandi plánetur og allt sem komi of nálægt tætist yfirleitt í sundur vegna gríðarlegs þyngdarafls hvítu dverganna. Enn sé mörgum spurningum ósvarað um hvernig WD 1856 b hafi komist á núverandi stað án þess að mæta þessum örlögum.

Rannsóknin hefur verið birt í vísindaritinu Nature.

Í fréttatilkynningunni frá Cornell segir að þessi uppgötvun veki vonir um að í framtíðinni verði hugsanlega hægt að fá á hreint hvort líf geti lifað af að stjarnan hrynji saman og verði að hvítum dverg.