Aðfaranótt nýársdags 2017 gekk Abdulkadir Masharipov inn á næturklúbb í Istanbúl í Tyrklandi og skaut 39 manns til bana. Hann er talinn vera félagi í hryðjuverkasamtökunum sem kenna sig við Íslamska ríkið. Á mánudaginn dæmdi tyrkneskur dómstóll hann í 40 lífstíðarfangelsi fyrir ódæðið.

Masharipov, sem er frá Úsbekistan, var sakfelldur fyrir 39 morð og eina morðtilraun. Hann var því dæmdur í 40 lífstíðarfangelsi án möguleika á reynslulausn. Að auki var hann dæmdur í 1.368 ára fangelsi fyrir að hafa reynt að myrða 79 til viðbótar.

Ilyas Mamasaripov var fundinn sekur um að hafa aðstoðað Masharipov og var hann dæmdur í 1.432 ára fangelsi.

58 til viðbótar voru ákærðir. 11 voru sýknaðir en hinir hlutu misþunga dóma.