Biden lét þessi orð falla á fundi með félögum í verkalýðshreyfingum á miðvikudaginn. Þar lýsti heilbrigðisstarfsmaður einn yfir áhyggjum af því að Trump hefur ítrekað sagt kórónuveiruna vera „kínversku veiruna“. Biden svaraði þessu og sagði Trump vera rasista.
Hann sagði það „gríðarlega ógeðfellt“ að húðlitur fólks eða uppruni fólks ráði því hvernig Trump kemur fram við það.
„Enginn annar forseti hefur nokkru sinni gert það. Aldrei, aldrei, aldrei. Enginn forseti úr röðum Repúblikana hefur gert það. Enginn forseti úr röðum Demókrata. Það hafa verið rasistar í Bandaríkjunum, þeir hafa verið til og nokkrir hafa reynt að verða forseti en hann (Trump, innsk. blaðamanns) er sá fyrsti sem tókst það.“
Katrina Pierson, talskona forsetaframboðs Trump, gagnrýndi Biden fyrir þessi ummæli og sagði þau „móðgun við gáfnafar svarts fólks“. Hún sagði að Trump „elski alla“ og leggi hart að sér „við að styrkja alla Bandaríkjamenn“.
Hvað varðar ummæli Biden um að Trump sé fyrsti rasistinn sem gegnir forsetaembættinu hefur verið bent á að sumir fyrrum forseta landsins hafi sjálfir átt þræla eða staðið fyrir pólitískri stefnu sem kúgaði frumbyggja landsins.
