Þegar leið á daginn versnaði heilsan hjá þessari 57 ára konu og skyndilega hneig hún niður. Hún var úrskurðuð látin skömmu síðar og læknar sögðu fjölskyldu hennar að hún hefði fengið hjartaáfall. En það var eitthvað við andlátið sem læknunum fannst ekki passa. Af hverju hætti hjarta heilbrigðrar konu skyndilega að slá? Af hverju sýndi krufningin að sýking var í hjartanum og sama sýking í lungunum?
Sýni voru tekin til rannsóknar og var leitað að inflúensu og öðrum sjúkdómum en án árangurs. Andlát hennar var því ákveðin ráðgáta, þar til tveimur mánuðum síðar þegar læknum datt í hug að rannsaka vefsýni úr Patrica í leit að kórónuveirunni.
Niðurstaðan kom fljótlega og þá lá ljóst fyrir að Patrica var fyrsta fórnarlamb kórónuveirunnar, sem veldur COVID-19, í Bandaríkjunum.
Þá vaknar spurning um af hverju þetta var ekki rannsakað þegar hún lést? Svarið er að þegar hún lést þann 6. febrúar sátu bæði Bandaríkjamenn og Evrópubúar rólegir og höfðu nær engar áhyggjur af kórónuveirunni sem þá herjaði í Kína. Auk þess hafði Donald Trump, Bandaríkjaforseti, fullvissað samlanda sína um að stjórnvöld hefðu fulla stjórn á málum, annað átti nú heldur betur eftir að koma á daginn.
Ekki er enn vitað hvar Patricia smitaðist af veirunni en vitað er að það hlýtur að hafa verið í Kaliforníu því hún hafði ekki farið til útlanda. Sérfræðingar eru nú að reyna að komast að hvar hún smitaðist.
