Snjórinn hefur ekki verið betri á finnska skíðastaðnum Levi síðustu 50 til 60 árin. Svo mikið snjóaði í vetur að 1,2 til 1,3 metrar af jafnföllnum snjó liggja nú yfir skíðabrekkunum. En lítið hefur verið um skíðafólk undanfarnar vikur vegna COVID-19 faraldursins. En rekstraraðilum staðarins finnst algjörlega ótækt að láta þennan góða snjó fara til spillis og því ætla þeir að geyma snjóinn þar til í haust.

Eflaust þykir mörgum þetta undarlegt enda ekki bara hægt að setja snjó í poka og geyma fram á haustið. En Marko Mustonen, framkvæmdastjóri Levi, er stórhuga eins og hann skýrði frá í samtali við BBC.

Hann ætlar að reyna að geyma um 150.000 rúmmetra af snjó þar til í haust til að geta lengt haustopnunina. Ef þetta gengur upp geta finnskir skíðamenn brugðið sér á skíði strax í október.

Starfsfólk skíðasvæðisins hefur nú í einn mánuði unnið baki brotnu við að safna 150.000 rúmmetrum af snjó sem einangrandi dúkur hefur nú verið lagður yfir. Hann á að sögn að geta varið snjóinn fyrir bæði rigningu og sumarhitum. Reiknað er með að bráðnunin verði aðeins 5 til 10 prósent fram á haust.