Börn hætta auðvitað ekki að fæðast þótt heimsfaraldur COVID-19 gangi nú yfir heimsbyggðina. Nýlega fæddust tvíburar, drengur og stúlka, í Chhattisgarh á Indlandi. Foreldrar þeirra ákváðu að þau skyldu fá nöfnin Corona og Covid en þetta verður nú að teljast ansi undarleg nafngift því erfitt er að tengja eitthvað jákvætt við þessi nöfn.

Tvíburarnir fæddust þann 27. mars en þá hafði útgöngubann verið sett á á Indlandi. Foreldrarnir heita Preeti og Vinay Verma. Sky skýrir frá þessu.

Móðirin sagði í samtali við Press Trust of India að COVID-19 faraldurinn væri „hættulegur og ógni lífi fólks“ en hafi þó haft þau jákvæðu áhrif að fólk sé meðvitaðra um sótthreinsun, hreinlæti og aðrar góðar venjur.

„Þegar starfsfólkið fór að kalla börnin Corona og Covid ákváðum við endanlega að nefna þau eftir faraldrinum.“

Sagði hún og bætti við að nöfnin myndu minna þau á erfiðleikana sem þau glímdu við á tímum faraldursins.