Á sunnudaginn sagði hann að það væri varla nokkur forseti sem hefði staðið sig betur en hann.
„Þeir sem þekkja mig og þekkja einnig sögu landsins okkar segja að ég sé sá forseti Bandaríkjanna sem hefur lagt harðast að sér. Ég get ekki dæmt um það en ég legg hart að mér. Ég hef líklegast komið meiru í verk á fyrstu þremur og hálfu ári mínu í embætti en nokkur annar forseti.“
Sagði forsetinn að því er segir í umfjöllun The Independent.
Þessi ummæli komu skömmu eftir að Trump sagði að það væri ekki þess virði að halda daglega fréttamannafundi um COVID-19 faraldurinn sem hefur haft gríðarleg áhrif á heilsu og fjárhag tugmilljóna Bandaríkjamanna.
Trump var mikið í kastljósinu í síðustu viku eftir að hann lagði til að fólk innbyrti hugsanlega sótthreinsandi efni á borð við klór til að vinna á COVID-19 veirunni. Þessi hugmynd hans var fljótt skotin í kaf af læknum og framleiðendum sótthreinsiefna.
Trump sagði skömmu síðar að hann hefði bara verið kaldhæðinn þegar hann sagði þetta en það var um seinan því margir samlanda hans höfðu tekið orðum hans alvarlega og finnst hugsanlega ekkert fyndið við þau. Yfirvöld í Maryland skýrðu frá því á mánudaginn að heilbrigðisyfirvöldum í ríkinu hefðu borist mörg hundruð símtöl frá fólki sem vildi vita hvort hægt sé að halda COVID-19 veirunni frá sér með því að drekka sótthreinsi efni.
