Samkvæmt tölum frá Johns Hopkins háskólanum í Bandaríkjunum hafa 85.840 greinst með COVID-19 smit í Bandaríkjunum. Þar með eru skráð tilfelli í Bandaríkjunum orðin fleiri en í Kína en þar hafa 81.782 smit verið staðfest. Ítalía fylgir þar á eftir með 80.589 staðfest smit. Spánn er í fjórða sæti með 57.786 staðfest smit. Á heimsvísu hafa rúmlega 532.000 smit verið staðfest.

1.296 hafa látist af völdum veirunnar í Bandaríkjunum, 3.291 í Kína, 8.215 á Ítalíu og 4.365 á Spáni.

Tölurnar yfir staðfest smit eru ekki endilega haldgóð vísbending um hversu margir eru smitaðir af veirunni því talið er að miklu fleiri séu smitaðir en hafi ekki gengist undir próf. Einnig er mikill munur á milli landa á hversu mörg sýni eru tekin og við hvað er miðað áður en sýni eru tekin.

Bandaríkjamenn hafa verið hvattir til að halda sig heima og atvinnulíf er að stórum hluta lamað í landinu eins og víða annarsstaðar. New York hefur orðið verst úti í faraldrinum fram að þessu. Þar hafa yfirvöld hafist handa við að koma upp bráðabirgðalíkhúsum þar sem líkhús borgarinnar ráða ekki við álagið þessa dagana. Bráðabirgðalíkhús voru síðast notuð í borginni eftir hryðjuverkaárásirnar í september 2001 þegar tæplega 3.000 manns létust.