Kvikmyndaframleiðandinn og dæmdi kynferðisbrotamaðurinn Harvey Weinstein hefur greinst með kórónuveiruna sem valdið getur sjúkdómnum COVID-19.
Hinn 68 ára gamli Weinstein dvelur nú í einangrunarklefa í Wende-öryggisfangelsinu í New York-ríki í Bandaríkjunum, en nýverið var fundinn sekur um nauðgun og önnur kynferðisbrot og afplánar nú 23 ára fangelsisdóm vegna þess.
Það tók kviðdóm í málinu gegn Weinstein fimm daga að komast að niðurstöðu. Hann var á endanum sakfelldur fyrir brot gegn tveimur konum, en sýknaður af alvarlegustu ákærunum. Þær hefðu getað leitt til þess að hann sæti inni til æviloka.
Tugir kvenna stigu fram fyrir nokkrum árum og sökuðu Harvey Weinstein um ýmis kynferðisbrot gegn þeim. Vitnisburður þeirra er talinn hafa komið af stað #metoo-byltingunni, sem varð til þess að fjölmargir karlmenn í háum stöðum voru bornir þungum sökum um kynferðisofbeldi gegn konum.
Talið er að Weinstein sé einn tveggja fanga í Wende sem greinst hafa með veiruna. Í New York-ríki hafa yfir 15 þúsund manns greinst og 114 látist.
