Hjá írska lággjaldaflugfélaginu Ryanair er peningakassinn langt frá því að vera tómur þrátt fyrir að heimsfaraldur kórónuveirunnar hafi gert flugfélögum síðustu mánuði mjög erfiða. Félagið pantaði í síðustu viku 75 Boeing 737 Max flugvélar í viðbót við þær 60 sem það hafði áður pantað.

Það verður því nóg að gera hjá Boeing á næstunni við að framleiða vélarnar fyrir Ryanair en Max vélarnar hafa að mestu staðið á jörðu niðri síðan í mars á síðasta ári þegar þær voru kyrrsettar í kjölfar tveggja mannskæðra flugslysa. Bandarísk flugmálayfirvöld hafa nú veitt þeim flugheimild á nýjan leik en það hafa evrópsk flugmálayfirvöld hins vegar ekki enn gert.

Á fréttamannafundi í Washington, þar sem Michael O‘Leary, forstjóri Ryanair, tilkynnti um kaupin sagði hann Boeing 737 Max vera frábærar vélar. Kaupverð vélanna er sem svarar til um 2.750 milljarða íslenskra króna.