Í gær komu kjörmenn saman í öllum ríkjum Bandaríkjanna og kusu næsta forseta landsins. Um formlega athöfn er að ræða því niðurstaðan er auðvitað löngu ljós. Meirihluti kjörmannanna hefur nú þegar greitt Biden atkvæði sitt en niðurstaðan liggur ekki fyrir í öllum ríkjunum þegar þetta er skrifað. Það er þó ljóst að Biden hefur fengið atkvæði rúmlega 270 kjörmanna og því getur ekkert komið í veg fyrir að hann setjist á forsetastól þann 20. janúar næstkomandi.

Þrátt fyrir ítrekaðar tilraunir hefur Donald Trump, núverandi forseta, ekki tekist að hnekkja úrslitum forsetakosninganna en hann hefur sett fram hverja samsæriskenninguna á fætur annarri um að svindlað hafi verið í kosningunum en hefur ekki tekist að leggja fram nein gögn því til staðfestingar.

Það er því óhætt að segja að enn sé salti nuddað í sár hins mjög svo tapsára forseta en flest hefur gengið honum í óhag í þessum tilraunum sínum til að fá úrslitum kosninganna breytt. Dómstólar, þar á meðal hæstiréttur, hafa vísað öllum kröfum hans, nema einni, frá og hver ósigurinn á fætur öðrum hefur dunið á honum.

Þegar allir kjörmennirnir hafa greitt atkvæði er reiknað með að Biden hafi fengið 306 atkvæði en Trump 232.