Danska lögreglan leitar nú logandi ljósi að líki Maria From Jakobsen, 43 ára, sem hún telur fullvíst að hafi verið myrt. 44 ára karlmaður var á mánudaginn úrskurðaður í gæsluvarðhald, grunaður um að hafa orðið henni að bana. Hann neitar sök. En miðað við þær upplýsingar sem hafa komið fram í málinu þá virðist lögreglan hafa ansi góðar ástæður til að gruna hann um morð.

Maria yfirgaf að sögn heimili sitt í Frederikssund á Sjálandi þann 26. október og var þá að sögn mjög niðurdregin. Hún á eiginmann og tvö börn. Tilkynnt var um hvar hennar daginn eftir. Fjórum dögum síðar fann vegfarandi bíl hennar við Bellahøj. Lögreglan lýsti eftir henni og leitaði hennar. Á mánudaginn dró síðan til tíðinda þegar lögreglan girti heimili hennar af og hóf umfangsmikla vettvangsrannsókn. Síðar um daginn var tilkynnt um handtöku 44 ára karlmanns sem væri grunaður um að hafa orðið Maria að bana.

Hjá manninum fann lögreglan mikið magn saltsýru og töluvert af lút. Grunur leikur á að þessi efni hafi verið notuð til að leysa lík Maria upp. Ekstra Bladet skýrir frá þessu. Þegar lögreglan krafðist gæsluvarðhalds yfir manninum kom einnig fram að maðurinn hafði leitað sér upplýsinga á netinu um sjávardýpt, olíutunnur, sjálfsvíg, mannshvörf og hreinsiefni. Allt þetta geti tengst upplýsingaöflun um hvernig sé hægt að losa sig við lík.

Talsmaður lögreglunnar sagði að þessar upplýsingar veki auðvitað ákveðnar grunsemdir um hvað hafi gerst en það sé verkefni lögreglunnar núna að komast til botns í málinu.

Dómari lagði bann við að nafn hins grunaði væri birt og því hafa danskir fjölmiðlar ekki getað skýrt frá miklu um hann annað en að hann tengist Maria. Má lesa úr umfjöllun þeirra að um eiginmann hennar sé að ræða.