Meðal þess sem andstæðingar bólusetninga hafa varpað fram er að bóluefnið sé liður í að fækka fólki. Sumir segja að bóluefnið sé hluti af áætlun um að gera fólk ófrjósamt og enn aðrir segja að það hafi verið í þróun í 15 ár! Eins og við er að búast segjast margir hvorki ætla að láta bólusetja sig né börn sín.
Reiknað er með að byrjað verði að bólusetja fólk innan nokkurra vikna ef lyfjaeftirlitsstofnanir gefa grænt ljós á notkun bóluefnisins.
Í umfjöllun Daily Mail um málið kemur fram að margar mæður hafi tjáð sig á Facebooksíðunni Save Our Rights og lýst því yfir að þær muni ekki láta bólusetja sig eða börn sín. Einn notandi sagði að um ófrjósemisáætlun sé að ræða og aðrir hvöttu til aðgerða gegn bóluefninu og framleiðslu þess.
Lara Crabb, sem vakti athygli í sumar þegar hún neitaði að nota andlitsgrímu á almannafæri, spurði fylgjendur sína hvort það gæti ekki verið að bóluefnið hafi verið í þróun síðustu 15 ár. Hún sagði það geta tengst „Agenda 2030“ sem er samsæriskenning sem gengur út á að New World Order sé að reyna að fækka fólki með því að nota ýmis bóluefni. Hún segir einnig að hugsanlega hafi samfélagsmiðlar verið fundnir upp sem hluti af „Agenda 2030“.
Dan Evans, varaði við því á Twitter, að bóluefnið væri „eitur“ sem væri búið til af sömu illmennunum og slepptu veirunni lausri.
