Alþjóðaheilbrigðismálastofnunin WHO segir að þeirri hugmynd hafi skotið upp hjá sumum að leyfa eigi kórónuveirunni, sem veldur COVID-19, að fara óheft um samfélög heims til að hægt verði að mynda hjarðónæmi. Tedros Adhanom Ghebreyesus, framkvæmdastjóri WHO, segir að það sé „ósiðlegt“ að láta veiruna vera stjórnlausa í þessu skyni.

Þetta sagði hann á fréttamannafundi á mánudaginn. Hann sagði ekki hver, hverjir eða hvaða ríki hafi viðrað þessar hugmyndir. Hann sagði að hjarðónæmi hafi aldrei verið notað sem áætlun til að bregðast við faraldri. Hann segir slíkt vera óviðeigandi, bæði vísindalega og siðferðilega.

„Að láta veiru, sem við skiljum ekki til fulls, vera stjórnlausa er einfaldlega siðlaust. Það er ekki hægt,“

sagði hann.

Hann sagði að hjarðónæmi væri hugtak sem er notað í tengslum við bóluefni þegar réttum þröskuldi er náð hvað varðar fjölda ónæmra einstaklinga. Til dæmis er talið að ef 95% fólks er bólusett gegn mislingum þá njóti hin 5% verndar gegn sjúkdómnum.

„Hjarðónæmi næst með því að vernda fólk gegn veiru, ekki með því að smita það af henni,“

sagði hann.