Kafari var nýlega drepinn af hvíthákarli þegar hann var að kafa nærri báti sínum við Cull eyju í vesturhluta Ástralíu. Lík hans hefur ekki enn fundist. Yfirvöld segja að maðurinn hafi hlotið banvæna áverka af völdum hákarlsins. Kona, sem var um borð í bátnum, var flutt á sjúkrahús en hún varð fyrir miklu áfalli við að verða vitni að árásinni.

Sky skýrir frá þessu. Þetta er í annað sinn á þremur árum sem hvíthákarl verður manni að bana á þessu svæði. Ian Mickel, bæjarfulltrúi í bænum Esperance sem er nærri Cull eyju, sagði að það væri mikið áhyggjuefni að hákarl hafi orðið manni að bana á svæðinu nú þegar mörg þúsund manns eru að njóta strandlífsins.

Fyrir tæpum þremur árum varð hákarl Laeticia Brouwer, 17 ára sjóbrettakappa, að bana á þessu svæði. 2014 missti maður vinstri handlegg og hægri hönd eftir að hákarl beit hann.