CNN skýrir frá þessu og segir að þetta komi fram á vefsíðunni Officer Down Memorial Page (ODMP). Það er sjálfseignarstofnun sem stendur að baki vefsíðunni og fylgist með hversu margir lögreglumenn láta lífið við skyldustörf.
Að minnsta kosti 101 lögreglumaður hefur látið lífið af völdum COVID-19 en að minnsta kosti 82 af öðrum orsökum. Enn er unnið að því að staðfesta dánarorsakir 150 lögreglumanna til viðbótar en talið er að þeir hafi látist eftir að hafa smitast af COVID-19 við skyldustörf.
Skotárásir eru næstalgengasta dánarorsökin en 31 lögreglumaður hefur látið lífið í skotárásum það sem af er ári.
Dánartíðnin af völdum COVID-19 er svo há að hún gæti orðið hærri en við hryðjuverkaárásirnar í september 2001. Þá létst 71 lögreglumaður þegar World Trade Center hrundi og einn í árás í Shanksville í Pennsylvania. 311 lögreglumenn, til viðbótar, hafa látist af völdum krabbameins sem tengist hryðjuverkaárásunum að sögn ODMP.
Minningarsjóður lögreglumanna er með svipaðar tölur yfir fjölda látinna og ODMP. Á vef sjóðsins, The National Law Enforcement Officers Memorial Fund (NLEOMF) kemur fram að 111 lögreglumenn hafi látist af völdum COVID-19. Flestir í Texas eða 24 og því næst í Louisiana þar sem 12 hafa látist.
