Árið hefur verið erfitt fyrir flugiðnaðinn um allan heim vegna heimsfaraldurs kórónuveirunnar. Ástralska flugfélagið Qantas hefur fundið fyrir því eins og flest flugfélög. Félagið hefur tekið Airbus A380 vélar sínar úr notkun vegna faraldursins og bætir nú enn við og „leggur“ tveggja ára gömlum Boeing 787-9 Dreamliner vélum sínum í Mojave eyðimörkinni í suðurhluta Kaliforníu.

Síðan faraldurinn hófst hafa vélarnar verið notaðar til að sækja ástralska strandaglópa víða um heiminn en nú er komið að því að vélarnar fái frí og fái að standa í eyðimörkinni. Flestar vélanna 11 verða geymdar á Victorville Southern California Logistics Airport en þar eru fyrir um 200 farþegaflugvélar frá flugfélögum víða að úr heiminum.

Qantas heldur þó nokkrum Dreamliner vélum heima í Ástralíu til að geta brugðist við ef þörf verður á flugi. Félagið væntir þess að vélarnar verði í Kaliforníu þar til í júlí á næsta ári. Ástæðan fyrir að vélarnar eru geymdar í eyðimörk í Kaliforníu frekar en ástralskri eyðimörk er að loftslagið. Það er mun rakara loft í Ástralíu en það eru ekki kjöraðstæður fyrir geymslu flugvéla og því varð Kalifornía fyrir valinu.