Niðurstöður nýrra rannsókna benda til að COVID-19 sjúkdómurinn geti haft langvarandi afleiðingar fyrir þá sem smitast af honum. Ýmislegt þykir benda til að hann geti náð langt inn í æðakerfið og jafnvel til heilans.

Telegraph skýrir frá þessu. Fram kemur að sjúkdómurinn geti hugsanlega valdið langvarandi síþreytu hjá sumum. Frá upphafi hafa sjónir manna aðallega beinst að áhrifum sjúkdómsins á öndunarfærin en í nokkrum rannsóknum, sem hafa verið birtar á undanförnum vikum, kemur fram að hann virðist geta náð langt inn í æðakerfið og jafnvel upp í heila.

Harvey Moldofsky, fyrrum prófessor við Toronto háskólann í Kanada, sagði að enn sem komið er séum við á byrjunarreit að skilja hver langtíma áhrif faraldursins eru en það sé ljóst að sjúkdómurinn ráðist ekki bara á lungun.

Hann sagði að miðað við eigin reynslu af Sars þá hafi hann miklar áhyggjur af að skilgreiningin á „að hafa náð sér“ sé of þröng varðandi COVID-19. Líklega muni sumir sjúklingar glíma við króníska síþreytu mánuðum og jafnvel árum saman eftir að þeir smitast.

Krónísk síþreyta veldur meðal annars mikilli þreytu eða örmögnun, verkjum, höfuðverk og svefn fólks skilar ekki þeirri hvíld sem hann á að gera. Á heimasíðu ME-félagsins er hægt að lesa meira um sjúkdóminn.