Mörg asísk flugfélög eiga nú í miklum vanda vegna kórónaveirunnar COVID-19. Fáir þora að ferðast og flugvélar því ekki þéttsetnar þessa dagana. Mörg flugfélög hafa því gripið til þess ráðs að lækka verðið á vinsælum leiðum mikið í þeirri von að þau nái að þrauka á meðan veiran herjar á heimsbyggðina.

Spring Airlines, stærsta lággjaldaflugfélagið í Kína, hefur til dæmis lækkað verð á miðum á milli Shanghai og Chongqing, sem er þriggja tíma flug, niður í 29 yuan, sem svarar til um 550 íslenskra króna, og eru skattar og gjöld innifalin. Til samanburðar má nefna að kaffibolli kostar 32 yuan hjá Starbucks í Kína.

Vietjet Air selur einnig miða á spottprís þessa dagana. Hægt er fljúga á milli Bangkok og Hanoi fyrir sem svarar til tæplega 300 íslenskra króna með sköttum.

Það sem af er febrúar hefur tæpla 70% af öllum flugferðum í Kína verið aflýst. Þetta kemur sér að vonum illa við flugfélögin sem glíma mörg hver við erfiðan rekstur fyrir.