Bernie Sanders vann öruggan sigur í forvali demókrata í Nevada sem fór fram í gær. Þegar þetta er skrifað er búið að telja 43% atkvæða og hefur Sanders hlotið 46% þeirra. Næstur kemur Joe Biden, fyrrum varaforseti, með 20% fylgi. Sanders, sem er 78 ára, fékk einnig flest atkvæði allra frambjóðendanna hjá ungum kjósendum eða tvöfalt fleiri en sá sem kemur næstur. Hann fékk einnig flest atkvæði hvítra kjósenda sem teljast vera til vinstri í flokknum og frá kjósendum sem ekki eru hvítir. Þetta veikir rök Joe Biden um að hann sé eini frambjóðandinn sem getur fylkt Bandaríkjamönnum, óháð stétt og stöðu, að baki sér til að sigra Donald Trump í forsetakosningunumí nóvember.

Niðurstaðan sýnir að Sanders, sem náði einnig góðum árangri í Iowa og New Hampshire, höfðar til breiðs hóps kjósenda með boðskap sínum um félagslegt og efnahagslegt réttlæti. Hann virðist því geta byggt upp breiða samstöðu kjósenda allt frá landbúnaðarríkjunum í miðvesturríkjunum til fjölmenningarsamfélaga eins og í Nevada.

Sanders var kominn til Texas þegar tölur fóru að berast og þar ávarpaði hann stuðningsmenn sína.

„Í Nevada mynduðum við bandalag þvert á kynslóðir og kynþætti. Þetta hratt af stað bylgju, ekki bara í Nevada, heldur í öllu landinu.“

Í Nevada greiddu 44% hvítra kjósenda Sanders atkvæði en aðeins 22% Biden. 66% 17 til 29 ára kjósenda studdu Sanders en 10% Pete Buttigieg og 9% studdu Biden.