Í mörgum evrópskum borgum er nú rætt af mikilli alvöru um að leggja sérstaka skatta á ferðamenn, túristaskatt. Nú þegar hafa slíkir skattar verið lagðir á í Amsterdam og Róm og fljótlega gæti borgunum fjölgað.

VG skýrir frá þessu. Fram kemur að um síðustu áramót hafi skattar á ferðamenn hækkað í Amsterdam. Fram að því þurftu þeir að greiða 7% skatt ofan á gistiverðið en frá áramótum voru 3 evrur til viðbótar lagðar ofan á skatinn, óháð því hvað gistingin kostar. Þessi sami skattur nær einnig til Airbnb og sambærilegra gistimöguleika. Markmiðið er að fækka ferðamönnum í borginni en hún glímir við alltof mikla ásókn ferðamanna.

Álíka skattar hafa verið lagðir á í Dortumund, Mallorca og mörgum ítölskum borgum og bæjum.

Í Feneyjum verður nýr túristaskattur lagður á frá 1. júlí. Hann verður 3 evrur á hverjum sólarhring utan háannatíma og á virkum dögum en 8 evrur um helgar á háannatíma. Markmiðið er það sama, að reyna að fækka ferðamönnum en 25 til 30 milljónir ferðamanna heimsækja borgina árlega.

Í Róm hafa sérstakir ferðamannaskattar einnig verið lagðir á en þeir nema 7 evrur á hverja gistinótt á fimm stjörnu hótelum. Í Dortmund er lagður 7,5% skattur á hverja gistinótt.

Í Noregi er nú verið að ræða að leggja túristaskatt á og slík umræða er einnig í gangi í Skotlandi og nokkrum breskum bæjum og borgum.