Howard Kirby, karlmaður í Michigan í Bandaríkjunum, skellti sér á flóamarkað á dögunum. Það væri svo sem ekki í frásögur færandi nema fyrir þær sakir að hann keypti sér sófa á 70 dollara, tæpar tíu þúsund krónur.

Eins og verðmiðinn gefur kannski til kynna var ekki um neitt sérlega glæsilegan sófa að ræða – og ekki heldur mjög þægilegan. Hann var harður og það reyndist góð ástæða fyrir því. Þegar dóttir Howards tók upp eina pulluna blasti óraunveruleg sjón við; alveg hreint heill haugur af seðlum.

Í heildina voru 43 þúsund Bandaríkjadalir faldir í sófanun, en það er upphæð sem nemur rúmum 5,3 milljónum króna.

Howard klóraði sér í kollinum yfir þessum óvenjulega fundi. Hann langaði vitanlega að eiga peningana enda þurfti hann að gera við þakið á húsi sínu. Hann hafði meira að segja samband við lögmann sem sagði að hann væri réttmætur eigandi peninganna.

En Howard leið ekki vel með að eigna sér peningana og hann hafði því samband við umræddan flóamarkað sem hafði upp á upphaflegum eiganda sófans. Öllum peningunum var svo skilað á fimmtudag í síðustu viku.

Eigandi peninganna heitir Kim Fauth-Newberry og var hann yfir sig ánægður þegar hann fékk þá aftur í hendurnar. Í ljós kom að afi Kims hafði komið peningunum fyrir í sófanum, en hann var nýlátinn og voru aðstandendur að reyna að koma eigum hans í verð eftir andlátið.