Það er vaxandi áhugi á kaupum á nútímalist sem fjárfestingu og það er ekki bara efnafólk sem kaupir nútímalist. Sérfræðingar vara fólk þó við að það sé ekki eins einfalt að kaupa listaverk eins og að kaupa skuldabréf eða fasteignir.

Á síðustu 34 árum hafa fjárfestingar í list skilað betri ávöxtun en mörg skuldabréf að því er segir í skýrslu frá bandaríska stórbankanum Citigroup. Frá 1985 til ársbyrjunar 2019 skilaði fjárfesting í nútímalist 7,5% ársávöxtun en fjárfesting í listaverkum impressjónista skilaði 5% ávöxtun. Að meðaltali skilaði fjárfesting í listaverkum 5,3% ársávöxtun á tímabilinu segir í skýrslunni.

Til samanburðar eru örugg skuldabréf nefnd til sögunnar en þau skiluðu árlegri ávöxtun upp á 6,5% en óöruggari skuldabréf skiluðu 8,1% ársávöxtun.

Verk bandaríska listamannsins Jeff Koons eru þau dýrustu í dag en verk Ólafs Elíassonar eru með þeim verðmætari á Norðurlöndunum.

Áhugi á list fer vaxandi víða um heim vegna meiri velmegunar en áður og þess að vextir á mörgum skuldabréfum er nálægt núlli.