Í október á síðasta ári tilkynntu Harry prins og eiginkona hans, Meghan hertogaynja, að þau ættu von á fyrsta barni sínu. Síðan þá hefur mátt sjá á myndum að magi Meghan hefur stækkað og stækkað. En eins og með svo mörg önnur mál þá eru samsæriskenningasmiðir í essinu sínu en mörgum þeirra, og mörgum öðrum, virðist vera mjög í nöp við Meghan.

Nú gengur sú samsæriskenning fjöllunum hærra á samfélagsmiðlum að Meghan sé ekki barnshafandi heldur geri hún sér upp óléttu með því að nota sérstaka óléttupúða undir kjóla sína. The Guardian skýrir frá þessu.

Á YouTube er hægt að finna mörg myndbönd um þetta og hafa sum þeirra fengið mörg hundruð þúsund áhorf. Myllumerkið #moonbump er mikið notað þegar þetta mál er til umfjöllunar á samfélagsmiðlum. #moonbump vísar til tungllendingarinnar 1969 sem margir samsæriskenningasmiðir telja vera uppspuna einan og hafi ekki verið neitt annað en sviðsetning á vegum bandarísku geimferðastofnunarinnar NASA.

Hér fyrir neðan getur að líta færslur nokkurra samsæriskenningasmiða á Facebook um málið.

Í umfjöllun samsæriskenningasmiða um hertogynjuna skrifa margir að magi hennar líti vel út en það sé svo undarlegt að hann hverfi þegar hún beygir sig. Aðrir benda á að stærð magans breytist dag frá degi.

Það fer fyrir brjóstið á mörgum að Meghan er bandarísk, fráskilin og hörundsdökk. Öfgasinnaðir hægrimenn hafa lengi haft horn í síðu hennar þar sem hún er allt að því táknmynd alls þess sem þeir fyrirlíta, lituð og útlend að auki.