Í viðtali í útvarpsþættinum Sciency Friday á föstudaginn skýrði Jim Bridenstine, yfirmaður bandarísku geimferðastofnunarinnar NASA, frá því að fyrsta manneskjan sem stígur fæti á Mars verði væntanlega kona. Hann vildi ekki segja hvaða kona en benti á að konur gegni stóru hlutverki í framtíðaráætlunum NASA.

BBC segir að ætlun NASA sé að senda fólk til Mars á fjórða áratug þessarar aldar.

En það er ekki bara á Mars sem konur munu koma við sögu því Bidenstein sagði einnig að næsta manneskjan, sem stígur fæti á tunglið, verði kona.

Það er meira á döfinni hjá konum í geimnum því í lok apríl munu Anne McIain og Christina Koch verða fyrstu konurnar til að fara í geimgöngu þar sem þær hreyfa sig frjálst um geiminn.

Frá því að fyrstu konurnar voru kynntar til sögunnar sem geimfarar 1978 hefur þeim fjölgað jafnt og þétt. Í dag er hlutfall kvenna meðal virkra geimfara hjá NASA 34 prósent.