Finninn Matti Nykänen lést í nótt, 55 ára að aldri. Hann var einn fremsti skíðastökkvari sögunnar. Hann keppti níu keppnistímabil í heimsbikarnum og sigraði í 46 keppnum. Hann vann fjögur ólympíugull og fimm heimsmeistaratitla. Þá var hann kjörinn íþróttamaður ársins í Finnlandi 1985 og 1988.

Finnskir fjölmiðlar skýra frá andláti hans í morgun. Ekki hefur verið skýrt frá dánarorsök hans. En líf Matti Nykänen var ekki eintómur dans á rósum því hneykslismál settu svip sinn á það. Hann var nokkrum sinnum dæmdur fyrir líkamsárásir og 2004 var hann dæmdur í rúmlega tveggja ára fangelsi fyrir að hafa stungið nágranna sinn með hnífi.