Bandaríska geimferðastofnunin NASA birti í gær mynd af dularfullum norðurljósum yfir Íslandi. Myndin var tekin fyrr í mánuðinum af Jingyi Zhang og Wang Zheng. Norðurljósin hafa tekið á sig mynd „dreka“ og virðist höfuðið hefjast upp til skýjanna.

Norðurljósin myndast þegar hraðfleygar rafmagnaðar agnir frá sólinni rekast á atóm og sameindir í lofthjúpi jarðarinnar, yfirleitt í um 100 km hæð eftir því sem segir á Stjörnufræðivefnum. Úr þessu verður oft mikið sjónarspil.

Í texta við myndina skrifar NASA:

„Hefur þú einhverntíma séð dreka á flugi? Þrátt fyrir að drekar séu ekki til í alvöru mynduðust risastór drekalaga norðurljós yfir Íslandi fyrr í mánuðinum.“

Síðan er útskýrt hvernig norðurljósin myndast af völdum rafmagnaðra agna frá sólinni.

Það sem þykir markverkt við þessi norðurljós er að þau voru þegar lítil virkni var í sólblettum sem þýðir að sólin sendi ekki eins mikið af rafmögnuðum ögnum frá sér eins og hún er vön.

„Engir sólblettir hafa birst á sólinni það sem af er febrúar sem gerir þessa hrífandi norðurljósavirkni svolítið undarlega.“

Segir á vef NASA.

En hvað sem því líður þá hljóta flestir að vera sammála um að myndin er stórkostleg.