Í Philadelphia voru neyðarteymi að störfum í sumar til að færa heimilislausum vatn. Ef það var ekki talið duga var fólkinu boðið upp á akstur í miðstöðvar, með loftkælingu, sem var búið að koma upp. Í Austin í Texas ákváðu borgaryfirvöld að ekki yrði lokað fyrir rafmagn hjá þeim sem ekki gátu greitt rafmagnsreikninga sína.
Í borgum á borð við Dallas og Jacksonville voru engar viðbragðsáætlanir. The Guardian segir að 24 af 30 stærstu borgum Bandaríkjanna hafi verið með viðbragðsáætlanir vegna hitabylgja en aðeins 10 þeirra voru með sérstakar áætlanir fyrir þá verst settu, til dæmis heimilislausa, eldra fólk og tekjulágt fólk.
Í nýrri skýrslu „Killer heat“ (Drápshiti) sem Union of Concerned Scientists hefur gefið út segir að yfirvofandi hitabylgjur feli í sér hættu sem sé alvarlega vanmetin. Í skýrslunni kemur fram að rúmlega 90 milljónir Bandaríkjamanna muni um miðja öldina búa við að hitinn fari yfir 40 gráður í 30 daga eða fleiri á ári. Þetta verði að skoða í því ljósi að í dag séu það „aðeins“ um 900.000 manns sem búi við slíkar aðstæður.
