Bráðamóttöku sjúkrahússins í Enköping í Svíþjóð var lokað í dag af ótta við að ebólusmitaður maður sé á sjúkrahúsinu. Sjúklingurinn hefur nú verið settur í einangrun á smitsjúkdómadeild háskólasjúkrahússins í Uppsölum og starfsfólk, sem komst í snertingu við manninn, fær viðeigandi aðstoð.

Aftonbladet skýrir frá þessu. Sýni hafa verið tekin úr manninum og heilbrigðisstarfsfólkinu og mun niðurstaða úr rannsóknum á þeim liggja fyrir í kvöld að sögn yfirvalda.

Ebóla er bráðsmitandi sjúkdómur sem hefur gosið upp öðru hvoru í nokkrum Afríkuríkjum, nú síðast í Lýðstjórnarlýðveldinu Kongó. Í nóvember höfðu 200 látist af völdum sjúkdómsins þar.