Þeir sem una gini ættu kannski ekki að lesa þessa frétt, hún hlýtur að vera átakanleg lesning fyrir þá því í síðustu viku láku 32.000 lítrar af gini niður á M6 hraðbrautina í Englandi. Þetta gerðist eftir að vöruflutningabíll ók aftan á tankbíl, sem var með ginið, þannig að gat kom á tankinn.

Loka þurfti hraðbrautinni á stórum kafla í 11 klukkustundir meðan unnið var að hreinsun. BBC skýrir frá þessu. Hætta var talin á að kviknað gæti í gininu ef bílar ækju yfir það. Því var froðu fyrst sprautað yfir það og síðan var vegurinn hreinsaður og gininu, sem ekki lak úr tankinum, bjargað yfir í annan tankbíl.

Margir bílstjórar sátu fastir í allt að fjórar klukkustundir vegna slyssins. Sumir þeirra drápu tímann með því að skrifa um þetta á Twitter. Bestu færsluna átti kannski Rahcel Sargeant:

„Ég er búin að sitja föst á M6 í tvær klukkustundir um 180 metra frá 32.000 lítrum af gini sem sullaðist niður. Átakanlegt að ég er ekki með sogrör.“