Aðstandendur kanadískrar konu sem hvarf sporlaust árið 1992 vita loks hvað gerðist, þökk sé hinum þrettán ára Max Werenka og GoPro-myndavélinni hans.

Max þessi var staddur fyrir skemmstu á sumarleyfisstað fjölskyldu sinnar við Griffin-vatn, um 250 kílómetra vestur af borginni Calgary, þegar hann sá glitta í eitthvað undir yfirborði vatnsins. Vatnið er skammt frá nokkuð fjölförnum þjóðvegi sem liggur í raun þvert í gegnum Kanada. Svo virtist vera sem bifreið væri ofan í vatninu.

Max og foreldrar hans höfðu samband við lögreglumenn sem komu á vettvang en sjálfur kafaði Max í vatnið með GoPro-myndavélina sína þar sem grunurinn um að þarna væri bifreið fékkst staðfestur. Það tók nokkra stund að ná bílnum á þurrt en fljótlega eftir að aðgerðir til að ná bílnum upp hófust kom í ljós að í ökumannssæti bifreiðarinnar voru líkamsleifar.

Líkamsleifarnar voru af hinni 69 ára gömlu Nancy Farris sem hvarf árið 1992. Hún var á leið í brúðkaup í Alberta þegar hún hvarf fyrir 27 árum. Svo virðist vera sem hún hafi einfaldlega misst stjórn á bifreið sinni með þeim afleiðingum að hún endaði ofan í vatninu.

Gerð var umfangsmikil leit að Nancy á sínum tíma sem skilaði engum árangri. „Það versta var að vita ekki neitt. Þetta er ákveðinn léttur þó þetta sé erfitt,“ segir George Farris, 62 ára sonur Nancy, við kanadíska fjölmiðla.