Videnskab.dk skýrir frá þessu. Fram kemur að breyta verði landbúnaði, notkun skóga, matvælaframleiðslu og matarvenjum. Minna kjöt og meira grænmeti er það sem koma skal á diska fólks. Ástæðan er að kjötframleiðsla losar miklu fleiri gróðurhúsalofttegundir og fer verr með jarðveginn en grænmeti.
Sama dag og skýrslan var birt voru birtir nýir útreikningar sem sýna að Bandaríkjamenn þurfa ekki að fara svangir í bólið eða líða næringarskort þótt allri kjötframleiðslu í landinu verði hætt og henni breytt í grænmetisræktun. Samkvæmt útreikningunum, sem voru birtir í vísindaritinu Scientific Reports, væri hægt að hætta notkun 35 til 50 prósent þess ræktarlands, sem er notað í Bandaríkjunum í dag, ef allir bandarískir bændur leggja kjötframleiðslu af. Ástæðan er að stór landsvæði eru notuð til að rækta fóður handa sláturdýrum.
Þau svæði sem myndi losna um með þessum hætti væri hægt að breyta í skóglendi sem dregur í sig koltvíildi úr andrúmsloftinu. Gidon Eshel, prófessor við Radcliffe Institure for Advanced Study í Harvardháskólanum, sagði í samtali við Videnskab.dk að útreikningar vísindamannanna séu mjög íhaldssamir. Líklegast verði enn meiri umhverfislegur ávinningur af því að skipta kjöti út fyrir grænmeti en niðurstöðurnar sýna.
Eshel og félagar hans notuðu reiknilíkön til að reikna út umhverfis- og næringaráhrif þess að breyta algjörlega um stefnu í landbúnaði. Með því að borða prótínríkt grænmeti, belgjurtir og korn geta Bandaríkjamenn fengið nægilegt magn af prótíni og það þótt öll þjóðin gerist grænmetisætur. Eshel segir að hægt sé að uppfylla allar næringarkröfur þjóðarinnar ef landbúnaðinum verði alfarið breytt í grænmetisiðnað, en hugsanlega þurfi fólk að taka B12 vítamín.