Í desember á síðasta ári drógu mannúðarsamtökin Læknar án landamæra sig út úr björgunarstarfi í Miðjarðarhafi og kölluðu skip sitt Aquarius þaðan. En nú ætla þeir aftur að láta til sín taka í Miðjarðarhafi og senda þangað skip í samvinnu við SOS Mediterranée.

Skipið á að bjarga flóttamönnum, innflytjendum og farandfólki sem reynir að komast yfir Miðjarðarhafið til Evrópu, aðallega frá Líbíu.

Útgerð Aquarius var hætt eftir ásakanir ítalskra yfirvalda um að skipið hefði losað sig við 24.000 tonn af rusli á ólöglegan hátt í ítölskum höfnum. Þessum ásökunum hafa Læknar án landamæra vísað á bug.

Það er misheppnuð pólitík evrópskra stjórnmálamanna sem veldur því að samtökin ætla nú að senda skip aftur til björguanrstarfa í Miðjarðarhafi. Norska skipið Ocean Viking heldur þangað í lok mánaðarins á vegum samtakanna.

Talsmaður Lækna án landamæra segir að stjórnmálamenn reyni að telja fólki trú um að það sé ásættanlegt að mörg hundruð manns drukkni og mörg þúsund þjáist og séu fastir í Líbíu, þetta sé ásættanlegt verð fyrir að hafa stjórn á innflytjendamálum. En hinn harði raunveruleiki sé að um leið og stjórnmálamenn boði endalok flóttamannavandans í Evrópu þá snúi þeir blinda auganum að hinum mannlega harmleik sem þessi stefna hefur í för með sér í Líbíu og á hafi út.