Kim Darroch, sendiherra Bretlands í Bandaríkjunum, sagði af sér í morgun, nokkrum dögum eftir að breskir fjölmiðlar birtu minnisblöð hans þar sem Donald Trump var harðlega gagnrýndur. Þannig sagði Darroch að Trump væri óhæfur forseti og að það sama mætti segja um ríkisstjórn hans. Bandaríkjaforseti svaraði fullum hálsi og sagði að bandarísk stjórnvöld myndu ekki hafa nein samskipti við breska sendiherrann í framtíðinni.
Theresa May, forsætisráðherra Bretlands, og aðrir ráðherrar ríkisstjórnar hennar höfðu lýst yfir fullum stuðningi við Darroch og var sett af stað rannsókn á því hvernig lekinn á gögnunum hefði átt sér stað. Þannig töldu ráðamenn að tiltölulega fáir hefðu haft aðgang að minnispunktunum og því ætti ekki að vera erfitt að finna þann sem bar ábyrgðina.
Sky fréttastofan sagði fyrir stundu að Darroch hefði ákveðið að segja af sér embætti eftir að hann fékk ekki stuðning frá Boris Johnson, sem flest bendir til að verði næsti forsætisráðherra Bretlands. Þannig hafi Johnson ekki vilja lofa því að Darroch yrði áfram í embætti sem sendiherra í Bandaríkjunum færi svo að Johnson sigraði í leiðtogakjöri íhaldsmanna.