Aðeins einni og hálfri viku eftir að Allissa L. Martin og Bradley S. Jenkins gengu í hjónaband í Las Vegas hrapaði Allissa niður af sjöundu hæð og lést samstundis. Örvinlaður eiginmaðurinn hringdi í lögregluna og sagði að Allissa hefði hrapað fram af bílastæðahúsi við Busch leikvanginn í St. Louis þar sem þau höfðu verið að horfa á hafnaboltaleik.

Lögreglan brást skjótt við og kom fljótt á staðinn. Þá lá Allissa látin á jörðinni. Samkvæmt frétt Washington Post byrjuðu hjónin að rífast á meðan leikurinn stóð yfir.

Þegar lögreglan kom á vettvang var Bradley þar og var hann drukkinn og æstur. Þegar lögreglumenn leituðu í bílastæðahúsinu fundu þeir síma Allissa og var upptaka í gangi á honum.

Bradley sagðist ekki hafa verið á staðnum þegar Allissa hrapaði og þvertekur hann fyrir að deilur þeirra hafi þróast yfir í ofbeldi. En hljóðupptakan á síma Allissa segir aðra sögu.

Í deilum þeirra og átökum virðist Allissa hafa ýtt á upptökuhnappinn á símanum. Því næst sneri hún myndavélinni að Bradley og öskraði á hann að hann ætti að hætta að lemja hana í andlitið. Skyndilega datt síminn síðan niður á jörðina. Skömmu síðar heyrist öskur þegar hún hrapar niður. Síðan heyrist þegar líkami hennar lendir á jörðinni segir í skýrslu lögreglunnar.

Þetta varð Bradley að falli og hann var handtekinn. Nú er beðið eftir niðurstöðu krufningar en í framhaldi af henni verður tekin ákvörðun um hvort hann verði ákærður fyrir morð.