Bæjaryfirvöld í Estepona, litlum strandbæ í Costa del Sol, hafa ákveðið að loka rennibraut sem átti að aðstoða gesti og gangandi við að komast hratt á milli tveggja gatna í bænum.

Rennibrautin sem um ræðir er 38 metrar og lýstu bæjaryfirvöld því yfir með stolti að rennibrautin væri sú lengsta sinnar tegundar á Spáni. Tilkoma hennar átti að spara vegfarendum tíu mínútna gang.

Aðeins einum degi eftir að rennibrautin opnaði ákváðu yfirvöld þó að loka henni aftur, enda höfðu fjölmargir meitt sig við að renna sér niður. Eins og meðfylgjandi myndband ber með sér skilaði rennibrautin ágætlega því hlutverki sínu að koma fólki hratt niður.

Nokkur myndbönd hafa birst á samfélagsmiðlum af fólki að renna sér niður. Sumir fengu sár á handleggi á meðan aðrir kvörtuðu undan annars konar verkjum.

Bæjaryfirvöld munu nú fara yfir hverju þarf að bæta úr áður en rennibrautin verður tekin í notkun aftur. Bærinn sagði þó í yfirlýsingu að sumir þeirra sem meiddu sig hafi ekki farið eftir leiðbeiningum um örugga notkun rennibrautarinnar. Stór meirihluta þeirra sem renndi sér niður hafi komist niður á öruggan hátt og án þess að meiða sig.