Ofskynjunarsveppir verða afglæpavæddir í borginni Denver í Bandaríkjunum og verður borgin þar með sú fyrsta vestan hafs sem gerir það.
Þetta mun þó ekki þýða að sala á sveppunum verði lögleg heldur mun breytingin gera það að verkum að sveppirnir munu ekki lengur teljast til hættulegra eiturlyfja. Leyfilegt verður að hafa sveppina undir höndum og neyta þeirra svo lengi sem viðkomandi hefur náð 21 árs aldri.
Baráttumenn frumvarpsins segja að sveppirnir geti hjálpað fólki sem glímir við vandamál eins og áfallastreituröskun eða áráttu- og þráhyggjuröskun.
Þrátt fyrir að sveppirnir hafi þessi jákvæðu einkenni, að sumra mati, eru þeir í efsta flokknum yfir hættuleg eiturlyf í öðrum ríkjum Bandaríkjanna. Á þeim lista eru einnig eiturlyfin heróín, LSD og MDMA svo dæmi séu tekin. Breytingin í Denver mun hins vegar setja sveppina í allt annan flokk og þannig gera það að verkum að handtökur og ákærur vegna þeirra muni allt að því hverfa.