Ríkasti maður Kína, Jack Ma, hefur blandað sér í umræðu á kínverskum samfélagsmiðlum um hvort 72 tíma vinnuvika sé skynsamleg. Þar hefur verið rætt um hvenær fólk vinni mikið og hvenær það vinni of mikið.

Ma segir að 72 tíma vinnuvika sé „gjöf sem sé meira virði en peningar“ eftir því sem segir í umfjöllun MarketWatch.

Umræðan hófst þegar byrjað var að ræða hvort hin svokallaða „996“ vinnuvika væri holl fyrir fólk. Tölurnar tákna að unnið sé frá 9 að morgni til klukkan 21 að kvöldi sex daga vikunnar.

„Ef við finnum eitthvað sem okkur líkar við er „996“ ekki vandamál.“

Skrifaði hann á sunnudaginn í athugasemd við umræðurnar á kínverska samfélagsmiðlinum Weido. Ma er milljarðamæringur og ríkasti maður Kína að sögn Forbes. Hann er þekktastur fyrir að hafa stofnað Alibaba.