Áhorfendur hlógu og skemmtu sér í margar mínútur á sýningu grínistans Ian Cognito í Bicester á Englandi í síðustu viku. Hann hafði sest á stól og hreyfði sig ekki í fimm mínútur. Allir töldu þetta hluta af atriði hans en svo var nú ekki. Hann var einfaldlega dáinn.

Fyrr í sýningunni hafði hann meira að segja grínast með eigin dauða.

„Hugsið ykkur ef ég myndi deyja hér á sviðinu fyrir framan ykkur.“

Af þeim sökum töldu áhorfendur að um hluta af sýningunni væri að ræða þegar hann settist og hreyfðist ekki meira.

BBC skýrir frá þessu.

Það liðu um fimm mínútur þar til áhorfendur áttuðu sig á að ekki var allt með felldu. Andrew Bird, sem stóð á bak við sýninguna, var fyrstur til að fara upp á sviðið en hann hélt lengi vel að hér væri um hluta atriðisins að ræða.

Tveir hjúkrunarfræðingar og lögreglumaður, sem voru á sýningunni, reyndu endurlífgun á Cognito en án árangurs.