Það er ekki með öllu hættulaust að ganga um með hringa á fingrum öllum stundum. Þessu fékk 33 ára fjölskyldufaðir að kynnast á dögunum og stendur hann uppi einum fingri fátækari í kjölfarið.

Paul Biggs er breskur fyrrverandi hermaður sem hefur meðal annars komist heill heim frá ferðum til stríðshrjáðra svæða í Afganistan og Írak. Hann var að klifra yfir girðingu á lóð nágranna síns þegar hringurinn festist í girðingunni. Slysið varð þegar Paul var að hoppa niður og festist hringurinn í girðingunni.

Biggs gekk í hjónaband þann 24. desember síðastliðinn en slysið varð þann 31. mars síðastliðinn.

Biggs var vitanlega þjakaður af sársauka eftir slysið en ók þó sjálfur á slysadeild þar sem læknar tóku á móti honum. Læknum tókst því miður ekki að bjarga fingrinum.

Biggs segir að hann hafi aldrei tekið hringinn af sér og kveðst hann heldur ekki ætla að stökkva yfir girðingar aftur – að minnsta kosti ekki með hring á fingri.

Slysið varð þegar Biggs var að sækja pakka á lóð nágranna síns í næsta húsi. Nágranni hans var ekki heima og brá hann á það ráð að vippa yfir girðinguna með fyrrgreindum afleiðingum.

Biggs segir við Mail Online að vinir hans séu duglegir að grínast í honum eftir slysið. „Þeir kalla mig Homer Simpson,“ segir hann en það er vísun í þá staðreynd að teiknimyndafígúrann er aðeins með fjóra fingur á hvorri hönd.