Matthew Lepra, 26 ára ástralskur milljónamæringur, er nú að leita að aðstoðarmanneskju til starfa. Hann ferðast víða um heiminn til að koma fram á ráðstefnum og lifir lúxuslífi. Aðstoðarmanneskjan á að sjálfsögðu að fylgja með á þessum ferðalögum og verður allur ferðakostnaður og uppihald greitt af Lepra. Auk þess eru laun í boði eða sem svarar til rúmlega sex milljóna íslenskra króna á ári.
Lepra veitir fyrirtækjum ráðgjöf varðandi viðskipti og ferðast mikið til Japan, Dubai og Bandaríkjanna til að koma fram á ráðstefnum. Auk þess að ferðast með Lepra og aðstoða hann við rekstur fyrirtækis hans á aðstoðarmanneskja að sjá um að kynna ýmsa þætti starfsemi hans.
Lepra segir sjálfur að hér sé um „svalasta“ starf heims að ræða. Aðstoðarmanneskjan þarf að búa yfir góðri tölvukunnáttu, geta sinnt mörgum verkefnum í einu og vegabréf viðkomandi þarf að vera í gildi.
Á YouTuberás hans er hægt að fá nánari upplýsingar um starfið.
