Lögreglan í Utrecht hefur umkringt hús í borginni en grunur leikur á að maðurinn sem skaut á vegfarendur þar í borg í morgun sé þar inni. Staðfest er að einn er látinn og nokkrir særðir eftir árásina. Líklega var um hryðjuverk að ræða.

Ekki liggur fyrir hvort byssumaðurinn hafi verið einn á ferð eða hvort fleiri hafi skotið á fólk. Hann sást aka frá vettvangi í rauðri bifreið af gerðinni Renault Clio, en bifreiðin fannst mannlaus skömmu síðar.

Þungvopnaðir liðsmenn sérsveitarinnar sitja um íbúðabyggingu sem er nokkur hundruð metrum frá staðnum þar sem árásin var framin. Talið er að byssumaðurinn sé þar inni sem fyrr segir.

Í hádeginu hækkuðu lögregluyfirvöld í Hollandi viðbúnaðarstig sitt vegna hryðjuverkaógnar í hæsta stig. Þetta á við um Utrecht og svæðið í nágrenni við borgina en ekki önnur svæði í Hollandi.