Mannréttindasamtökin Amnesty International segja að lögreglan í Venesúela taki andstæðinga Nicolás Maduro, forseta, af lífi. Samtökin segjast geta sannað að sex ungir menn hafi verið teknir af lífi fyrir að hafa mótmælt forsetanum. Mörg hundruð stjórnarandstæðingar hafa einnig verið handteknir af öryggissveitum forsetans.
Þetta kemur fram í nýrri skýrslu Amnesty um ástandið í Venesúela. Samtökin segja að margir mótmælendur hafi verið skotnir til bana á fimm daga tímabili í lok janúar og um 900 hafi verið handteknir.
Amnesty hvetur Mannréttindaráð Sameinuðu þjóðanna til að taka málið upp með því að setja óháða rannsóknarnefnd á laggirnar.
Erika Guevara-Rosas, yfirmaður Amnesty í Bandaríkjunum, segir að stjórnvöld reyni að nota ótta og refsingar til að berja á þeim sem krefjast breytinga í Venesúela. Ráðist sé á fátækasta fólkið sem sé einmitt fólkið sem ríkisstjórnin segist vinna fyrir en þess í stað sé fólk drepið, handtekið og því ógnað.
